بقلم : نجاح عبد الحميد
 |
| صورة أرشيفية |
إليكم حلقة جديدة من فلسفة الفقرا أو
فيلسوف الفقرا الى حكيت لكم عنه قبل كدة , أنا عارفة إنكم هاتقولوا ان مش وقت
الكلام دة , لكن الحقيقة إن وقتة ونص , وإننا مش المفروض دايما اننا نقول على
الفقرا انهم مش بيفهموا , لكن الحقيقة إن عندهم بعد نظر وفلسفة مش عند أى حد , ويبانوا
انهم مش فاهمين لكن الحقيقة إنهم مسابقينا بكتير اوى.
أفكركم بيه الأول صديقى ده عامل بكابو بالنهار وعامل فى نادى بالليل, الموقف حصل وانا بوزع بيان العمال للحشد ل30/6 , سألته هاتروح فين يوم الأحد الجاى , كان رده انه هايروح الشغل.
قولتلوا شغل ايه اليوم ده الناس كلها اجازة , رد عليا وقالى طول عمرى بخدم الناس اليوم ده بالذات انا هاروح , واعمل نفسى واحد من الناس الى انا بخدمهم , قولتلوا وايه الحكمة من كدة , قالى احاول أعيش مرة زى الناس دول , ولما قولتلوا لازم تشارك معانا , قالى هحاول .
ولما سألته عن ايه الى هومتوقعه يحصل يوم 30 , قالى
فى ناس هاتموت , وفى ناس هاتتحبس وفى ناس هاتخاف وترجع البيوت , ولما سألته أنا وأصحابى
وأحنا هنبقى فين , قالى انتوا هاتمثلوا فيلم الكرنك ضحكت وقولتلو ربنا يبشرك
بالخير.
سكت شويه وحكالى عن واحد من الناس الى بيشوفهم فى النادى الى هم معاهم فلوس , لما سأله أجيب الفلوس الكتير منين , قال له أنا عايزك تدعك الفانوس , فسمع الكلام وقعد يدعك الفانوس لكن للاسف العفريت ماطلعش فرديت علية , وقولتلوا كنت جبت سلك ودعكته كويس , ضحك وقال أكيد ماكانش هايطلع برده , ولما سألةه الباشا الى كان معاه ساعتها , قالوا لو طلع العفريت كنت هاتطلب منه ايه, ضحك وقال له كنت هأطلب منه أعيش مع العفاريت , وضحكت لما سمعت منه كدة لكن هى دى فلسفة الفقرا الى هانفضل طول عمرنا نحاول نفهمها ومانفهمهاش بردوا.
على فكرة احنا بنقول انهم متاخرين عننا جدا لكن للاسف لو كنا بنجرى عمرنا ماهانحصلهم.
المواضيع المرتبطة :
ليست هناك تعليقات:
إرسال تعليق