لا تندهشوا مما سأقول : " وكأن شيئا لم يحدث"

صورة أرشيفية

بقلم : سعيد عز الدين

لا تندهشوا مما سأقول ، وأنصحكم بسماع أغنية " عصفورين" لحمزة نمرة , إن كنتم لم تسمعوها من قبل ، ففيها تعريف للوطن في غاية البلاغة والروعة ، عندما قالت كلمات الأغنية :  "الوطن راحة القلوب ,  لو مبني طوب ، أو مبني قش"، وراحة لقلوب المواطنين يا سادة لن نصل لها إلا بتطبيق مفهوم الشفافية بين السلطة والمواطن ، حتى يشعر الأخير بأن السلطة تسهر على راحة قلبه ، فيشعر بوطنه و يستعيد وطنيته المفقودة.

وما حدث أمامي اليوم  بعد ما يادوب عدينا كارفورفي طريقنا من العامرية إلى وسط البلد ،أننا لاقينا بكل بجاحة عربية جيب كحلي من غير لوحات ، فيها أربعة ورا ماسكين رشاشات , آه رشاشات يعني سلاح مش رشاشات ميه،  وقدام واحد لابس لبس بدوي و كبير في السن , وجنبه سواق شاب ملامحه بدوية برضه.

وورا العربية دي، كان في عربية نقل بتجر عربية تانية نص نقل و كلهم من غير لوحات , رحنا أول حاجة عملناها أننا بلغنا النجدة و بعدين جرينا بسرعة و عديناهم و وصلنا لنقطة شرطة عسكرية ما كانش فيها غير مجند لوحده.

وقفنا حكينا له على اللي جايين عليه ،  والراجل كان محتاس ,  وقفت عربية BMW جنبنا ونزل راجل منها علشان يبلغ نفس البلاغ ،  وأحنا بنتكلم مع المجند ، عدت العربيات التلاتة ، و ربنا ستر و ما حصلش احتكاك.

 المهم، جرينا بسرعة وعديناهم تاني ووصلنا لبنزينة وطنية , ويا دوب عديناها ووقفنا على جنب لما لاقينا ظابط جيش وعسكري معاه آلي , وظابط مباحث وبعض العاملين بمحطة البنزين بيفردوا جريدة مسننة يمين الطريق تحسباً لمرور العربيات دي ، و هما في حالة إستعداد تام بالسلاح.

 المشكلة ان العربيات ما عدتش ,  وجت عربية نص نقل سايقها عرباوي و سأل ايه الموضوع ؟ , ولما حكيتله قاللي إنهم وقفوا على اليمين., روحنا بلغنا اللجنة اللي اتكونت وإحنا واقفين ، بس للأسف، بعد ما توقعنا إن خلاص الناس دي إتحاصرت وحتتمسك، لكن لاقينا بطء في رد الفعل.

الظابط لسه باعت يصحي الصول اللي نايم ، و بعد حوالي عشر دقائق من الإنتظار ، قرر الظابط رفع الجريدة المسننة والرجوع للمدرعة اللي راكنة في محطة البنزين ,  وكأن محدش بلغه بحاجة ، رغم عدم ظهور العربيات اللي كانت ورانا على طول , وبلاغ سواق النص نقل إنهم وقفوا على اليمين ، فبكل بساطة قررنا نكمل طريقنا ، و روحنا و رجعنا، ولم نشاهد تلك السيارات على أي جانب من الطريق من جديد ، ولاحظنا عودة مجند الشرطة العسكرية وراء الدشمة ليكمل يومه في هدوء، في نقطة الشرطة العسكرية ، و ودة طاقم المدرعة في بنزينة الوطنية لموقعهم داخل محطة البنزين تاركين الطريق , وكأن شيئا لم يحدث.

 ولعل ضبابية هذا الموقف ، لا تختلف كثيرا عن ضبابية كل ما يحدث في مصر على الساحة الأمنية والسياسية،  وأتمنى أن يطيل الله في عمري حتى أرى اليوم الذي تتحقق فيه "الشفافية" بمفهومها الشامل ، ليعلم على الأقل من خلالها رجل الشارع البسيط في مصر ، ما يحدث في شارعه , و لن أقول في وطنه ، فتلك الضبابية تولد لدى أي مواطن غيور على وطنه قلق و حيرة تفقده وطنيته بالتدريج.