"إسكندرية ما بقتش مارية" تطالب المحافظة بشبكات لصرف الأمطار

صورة أرشيفية

محلي – الإسكندرية : إسلام أبو المجد

بدأت اليوم حملة "إسكندرية ما بقتش مارية" تجميع التوقيعات , مطالبة المحافظة ورؤساء الأحياء بالقيام بواجبهم بموجب القانون , وإنشاء شبكات مجاري لتصريف مياه الأمطار بشوارع محافظة الإسكندرية , وأشارت : " المحافظة والأحياء وظيفتهم أنهم يخدموا الإسكندرانية ودا بموجب القانون" , وذلك على نموذج إليكتروني.

وقالت الحملة : "سنين الإسكندرانية غرقانين فى المطر، وسنين متعطلين عن أشغالنا بسبب المطر ، وسنين بنضحك على المحافظة اللى لسه بتنزح المطرة بالمقشات، ولما ربنا يلهمهم من عنده يبعتوا عربيات تشفط المياه اللى عملت الشوراع برك، وطبعا العربيات بتعطل الطريق أكتر ما هو متعطل" .

وأضافت الحملة : "الحل هو أن يكون فيه شبكات لتصريف مياة الأمطار فى الشوراع، وكلنا عارفين برده – أهالي وحكومة – أن شبكات مجاري تصريف المطرة دي مفروض تعملها المحافظة بس عاملين نفسنا مش واخدين بالنا وكل واحد بيتصرف اللى قدام بيته بركة بيحط طوبتين علشان يعرف يعدي أو يحاول يشوف واسطة عند الحي علشان عربية تيجي تشفط المياه".

ودعت الحملة مواطني الإسكندرية قائلة : "إحنا بندعوك أنك تطالب معانا بشوارع مفيهاش برك مياة بسبب المطرة، وتوقع معانا على العريضة الشعبية دي، ولو المحافظة لم تستجيب هنرفع قضية نلزمهم بإنشاء شبكات تصريف مياة الأمطار".

ومن الجدير بالذكر أن حملة "إسكندرية ما بقتش مارية" هي إحدى حملات ومبادرات  الجماعة الوطنية لحقوق الانسان والقانون , ومن أهدافها "الحق فى سكن ملائم".

.

والجماعة الوطنية لحقوق الإنسان والقانون تعرف نفسها  كجماعة حقوقية مصرية أنشأتها مجموعة من الشباب والشابات , من خلفيات اجتماعية وثقافية ودينية مختلفة , شاركوا فى التمهيد للموجة الأولي من الثورة المصرية وساهموا فيها , مؤمنين بأهمية وجود جماعة من أجل تعزيز حقوق الإنسان وحمايتها.

المواضيع المرتبطة :

  في الشتاء ... الإسكندرية تحتاج سباك