 |
| صورة أرشيفية |
محلي – الإسكندرية : إسلام أبو المجد
أصدرت اليوم اللجنة العليا لإضراب الأطباء بيان تحت عنوان
" إضرابنا علشانك" , وقالت في بيانها : "الناس
اللي بتسأل ليه الدكاترة عاملين إضراب ؟".
وأجاب البيان عن ذلك التساؤل بما يلي :
• لماتروح المستشفى شايل حد من قرايبك ولا صحابك
اللي متصاب في حادثة ومتلاقيش لا قطن ولا شاش وتضطر تجيبه من برة على حسابك ......
يبقى إضرابنا عشانك .
• لما تروح المستشفى معاك والدك أو والدتك صدره
واجعه , واحتمال يكون عنده جلطة في القلب ومتلاقيش الأدوية اللي بتدوب الجلطة في
المستشفى ..... يبقى إضرابنا عشانك.
• لما تروح المستشفى ومعاك مراتك عنها غيبوبة
بسبب السكر , أو لأي سبب تاني ومتلاقيش سرير في الرعاية المركزة , وتفضل تلف على المستشفيات
علشان تلاقي مكان يقبلها ..... يبقى إضرابنا عشانك.
•
لما تروح المستشفى شايل إبنك اللي لسة مولود على إيدك
, وتقعد تتحايل على الدكتور إنه يحطه في الحضانة وهو يحلفلك إن مفيش حضانة فاضية
ومتقدرش تعمل حاجة ..... يبقى إضرابنا عشانك.
•
لما تروح مستشفى تزور واحد مريض , وتلاقي الزبالة حواليك في
كل حتة , والحمامات متنفعش للبني ’دمين ..... يبقى إضرابنا عشانك.
•
لما تتحجز في مستشفى وتتعب بالليل , ومتلاقيش دكتور يلحقك
علشان الدكتور مزوغ , وراح مستوصف يدور على لقمة عي لولاده يكمل بيها الشهر .....
يبقى إضرابنا عشانك.
•
لما تروح الوحدة الصحية تصرف علاجك الشهري , ويقولولك إنه
مش موجود وتضطر تشتريه من أي صيديلة على حسابك بالشيء الفلاني
..... يبقى إضرابنا عشانك.
•
لما تلاقي الممرضة اللي المفروض إنها ملاك الرحمة قرفانة
منك ومكشرة في وشك ومش طايقة نفسها , عشان بتاخد 300 جنيه في الشهر ..... يبقى
إضرابنا عشانك.
•
لما عيان يدخل العمليات وتحصل له مشكلة بعد العملية علشان
الأدوات مش متعقم , لأن أجهزة التعلقيم بايظة أو الدكتور اللي عمل العملية ما أخدش
التدريب الكافي , اللي يخليه يعمل العملية دي أو إتأخر على ما عمل العملية بسبب
القصور في الأدوات أو الدكاترة أو غرف العمليات ..... يبقى إضرابنا عشانك.
•
لما تروح إستقبال المستشفى اللي جنبك وتلاقيه مقفول علشان
في ناس كسرت الإستقبال , لأن مريضهم مات من نقص الأدوية والأجهزة ..... يبقى إضرابنا
عشانك.
•
لما لما تكون ميزانية وزارة الصحة اللي مسؤولة عن صحة
المصريين كلهم تلت ميزانية الداخلية , وأقل من سدس ميزانية الجيش ..... يبقى إضرابنا
عشانك.
•
لما تكون تلت ميزانية وزرة الصحة بتروح في مكافآت وبدلات
للموظفين والمستشارين في الوزارة , اللي إحنا مش عارفين هما بيعملوا إيه أصلاً
..... يبقى إضرابنا عشانك.
وأكد البيان أن الإضراب غير شامل الخدمات
الطارئة مثل أقسام الطواريء والعناية المركزة والغسيل الكلوي والحضانات .
وأضاف أن الإضراب ساري
على المستشفيات التابعة لوزارة الصحة , ولا يتم تطبيقه في المستشفيات الجامعية , وأن عيادات نفقة
الدولة والعلاج الشهري يصرف خلال يومي الإثنين والخميس من كل أسبوع.
ومن الجدير بالذكر أن إضراب الأطباء يدخل اليوم إسبوعه الثاني , وقد
بدأ بمطالب :
1.
رفع
ميزانية وزارة الصحة لـ 15% من الميزانية العاملة للدولة.
2. إصدار قانون رادع للحد من التعدي على
المستشفيات.
3.
تطبيق
الكادر بشقيه المالي والإداري للعاملين في القطاع الصحي.
المواضيع المرتبطة
 |
| منشور إضراب الأطباء "إضرابنا علشانك" |
ليست هناك تعليقات:
إرسال تعليق