لا تقلق ... فقط تحرش

صورة أرشيفية

بقلم : نيفين سراج الدين

 مفيش هدف مفيش امل ... ايه بتعاني من البطالة و بتضرب حشيش عشان تنسى متجوزتش لحد دلوقتي وجارتك الي قدامك عانست عشان ازمة الجواز ومصاريفه ..  اليك الحل في بنات في الشارع لابسه مستفز حلال فيهم بصراحة الي حايحصلهم تحرش ولا تقلق واليك النصائح :

في وسط الزحمة

• في الزحمة المعالم والتفاصيل بتوه فرصتك فيها كبيرة , و تحرش فيها سهل وعلى ودنه يا معلم ولو هي لاحظت , اعمل نفسك مش واخد بالك اعمل عبيط مفيش مشكلة لازم تعرف إن ده حقك وتصدق كمان عشان الموضوع يعدي بيس.

• في حالة بقا ان البنت كده كلمتك وعملتلك فضيحه ولمت عليك الناس ,  قولها هو انا عملت حاجة ولو قالت آه شهد الناس عليها انها هي الي بترمي نفسهاعليك عشان مش لاقية عرسان والناس كالعادة حتحاول تهدي الموضوع يقوللها خلاص يا انسة.

• طب لو طلعت متجوزة قولها هو انتي جوزك خنقك مزهقك في البيت حطلعي على الناس في الشارع وطبعا شوف كام واحد مخنوق من مراته حيقف معاك.

• في حالة بقا انك اضربت وخدوك على القسم ياحلو متقلقش بالعكس ده ممكن هي الي يتعملها محضر تعدي بالضرب ولو طلبت هي انها تعمل محضر تحرش حيقولها الظابط نصيحة بلاش عشان الفضايح وانتي بنت وكلام كله مجتمع كده.             

يعني من الأخر تحرش ولا تقلق ...

ما بعد التحرش

هل انت انسان حيوان ام حيوان إنسان ؟

عارف ايه الفرق ؟

انت مين في الأتنين ؟

ولا متفرقش معاك ؟ وعندك مبررات ؟

ماهو الفرق الجوهري بين الأتنين ؟

حاسبلك حرية الإختيار تجاوب او متجاوبش  بس , وأنت بتجاوب حاول متتزنقش بين الأسئلة فلا يوجد مكان لك لكي تتحرش فقط فكر .

أما في نظري انا شوفت في مجتمع الغابة الحيوانات  بتتحرك بغرائزها , بس عمري ماشوفت حيوان لو تعدى على انثى حيوان لا يدافع عنها باقي الحيوانات من نفس الفصيل, لكن للأسف شوفت بني آدمين ممكن تتعرض فتاة امامهم لإنتهاك جسدي , ويضعوا آلاف المبررات فقط لإلقاء جميع التهم عليها ونسيوا المعتدي , ولن اذكرك بفتاة التحرير ست البنات وسميرة ابراهيم فهم اكبر مثال على ما أقول.

إنها أمراض  غرست وتحتاج  للعلاج

ولكي اكون موضوعية واحاول النظر برؤية شاملة إن ظاهرة التحرش لم تنشأ من بين الليلة وضحاها بل كانت نتيجة تراكم ظروف اجتماعية واقتصادية لنظام فاسد , بدل من أن يصنع الأمل والهدف للبناء الوطن للشباب هدمه بزيادة البطالة وارتفاع الأسعار وعجز الشباب على الإلتزام بمصاريف الزواج العالية , مما أدى إلى ارتفاع نسبة العنوسة في الجنسين بالإضافة الى إعلام وقنوات تصور الحياة مترفة ومبالغ فيهامساكن وشقق لا يستطيع صاحب الدخل المتوسط ان يصل لها .

بالإضافة الى زيادة القنوات الإباحية والكليبات بشكل مبالغ فيه رفعت طموحات الشباب الغير قادر من الجنسين , لصورة يريد ان يراها في واقعة , ويضاف عليها ان بالفعل غير قادر على الألتزام بكل المصاريف للزواج, بالإضافة لتصوير المسلسلات  ان المخدرات والخمر هي الحل الأمثل للشاب للتخلص من ضغوط الحياة.

نيجي بقى للمشكلة الأكبر وهي إزاي أصبحت ظاهرة التحرش مرض منتشر , وعلى فكرة مش الفتاة صاحبة اللبس المستفز هي اللي فقط بيتم التحرش بيها  , لو كان المبرر استفزاز الملابس لكن اغلب فتيات ونساء مصر يتعرضن يوميا للتحرش ورغم أن هناك قانون للتحرش إلا أنه لايتم تفعيله.

نقطة مهمة سأطلق عليها انا اسم ثقافة التحرش انها ثقافة تم غرسها بشكل واضح في المجتمع المصري , مثل ثقافة الحشيش خاصة في العشر سنين الأخيرة من حكم المخلوع , فكنا نشاهد في الأعياد اشكال واطفال لا يظهروا إلا في الأعياد والإحتفالات ,  يقوموا بالتحرش بالنساء والسرقة بشكل مبالغ فيه , وطبعا ده كان على عينك يا تاجر وأمام كل ناس شباب وكبار وكله , وفي المظاهرات يندس مجموعة بلطجية للتحرش بالنساء لإخافتهم واحجامهم عن السير في مظاهره مرة اخرى.

فليس الموضوع فقط ملابس مستفزة بدليل ان لدينا في العالم العربي دول عربية , بها نسبة تحرش على رغم من ارتفاع المستوى الإقتصادي والنساء لا يرتدين مايلفت بالعكس هما مش باين منهم حاجة اصلا , كما اننا عندنا بلد زي تونس النساء فيها متأثرين بالثقافة الفرنسية ولديهم مشاكل اجتماعية و اقتصاديه شبيهة بمصر , وبالطبع ممكن يكون عندهم تحرش لكن مش ظاهرة منتشرة بهذا شكل كما لديهم قوانين خاصة بالمرأة  , ولدينا دول اوروبية اذا حدث تحرش وهذا وارد بالطبع , ولكن لم تتحول الى ظاهرة رغم أن لديهم من الملابس ما يوصف بالمستفز في مجتمعنا , ولكن لديهم قانون يفعل في حالة مثل هذا.

السؤال هل لو توقفت بعض النساء عن ارتداء الملابس المثيرة هل ستختفي الظاهرة ؟ , ام تحتاج الى علاج ؟ , والثورة ألم تتطالب بتغيير وإعادة كرامة المصري , وهل في انتهاك حرمة الجسد اي كرامة ؟

إيه الفرق بين ظابط يتعدى على مواطن وينتهك حرمة جسده ؟ وبين شاب ينتهك حرمة جسد امرأة , أي كان المبرر ؟

حكاية على الماشي

زميلة لي ملتزمه ولا ترتدي الملابس المثيرة التي يضعها الكثيرين كسبب أساسي للتحرش كانت داخل اتوبيس نقل عام , وتعرضت لحادثة تحرش يمكن إذا تم سرد تفاصيلها بالبشعة ومن مراهق لم يكمل عامه 19 , ونتيجة الصدمة والصراخ تجمع الناس فأصرت على الذهاب الى القسم , وحاول الناس إثنائها مع توبيخ الولد , ولكنها أصرت وذهبت الى القسم ليجيبها الضابط بالقسم : " سيبهولنا احنا حنربيه" , ولكنها أصرت على محضر فكانت نصيحة الضابط : " مالوش لازمة انت آنسة عشان سمعتك "السؤال اومال لو كانت تعرضت لإغتصاب كان قال ايه ؟

عفوا ايها المتحرش

هل طالبت الثورة بدفع الظلم والفساد للظلم وفساد اكثر ؟ , ولماذا في 18 يوم في ميدان التحرير كان الشاب يدافع عن اخته في الميدان ولم ينظر للملابسها ولم يستحل التحرش بجسدها؟

من وجهة نظري لأن كان في هدف وأمل الجميع يلتف حوله , وعلى فكره قد يبرر البعض أن عدم التزام المرأة بدينها , ولكن لو كنت شايف ان المرأة ارتدائها لملابس مثيرة مخالف لدينها ؟ , وفي المقابل هل وضع الدين الحل بإنتهاك الجسد والتحرش ؟

عفوا ايها المتحرش اذا كانت ظروفك خلقتك منك انسان يتحرك بالغرائز, إذا فاليذهب الإنسان الى الغابة ويعيش الحيوان في المدينة.

 عفوا أيها المتحرش  هل تقبل اذا تعرضت يوم كرجل لإنتهاك جسدي او تحرش ؟ , ماهو شعورك و ماذا سيكون مبرر من حولك ؟

وعفوا ايها المتحرش حتقول ايه لأولادك واحفادك لما تيجي تعلمهم الأخلاق ؟ , هل هذه ضمن الأخلاق التي ستربي اولادك واحفادك مستقبلا عليها ؟

السؤال الأخير  للمتحرش والي بيوافق او بيتفرج على الظاهرة ديه ومش فرقة معاه تحب حق التحرش يتحط في الدستور بدل حق حماية جسد الإنسان ؟ ولا ايه رأيك يا وديع.